FAST FOOD !!!! - a poem by Krishna Dave.

લીમડાને આવી ગ્યો તાવ,

લીમડાના દાદા ક્યે કહી કહીને થાકી ગ્યો,

જાવ... હજી ફાસ્ટ ફૂડ ખાવ...

ટી-શર્ટને જીન્સવાળી માંજરી બિલાડી ક્યે

આપણને દૂધ નહિ ફાવે !

પિત્ઝાને બર્ગરની આખી આ પેઢીને

રોટલી ને શાક ક્યાંથી ભાવે ?

વર્ષોથી બોટલમાં કેદી થઇ સડતા એ

પીણાંને પીવો ને પાવ.

જાવ... હજી ફાસ્ટ ફૂડ ખાવ...

અપ ટુ ડેટ કાગડા ને કાગડીયુ માઈકમાં

મંડી પડ્યા છે કાંઈ ગાવા !

કંઈ પણ ભીંજાય નહી એવા ખાબોચીયામાં

નીકળી પડ્યા છો તમે ન્હાવા ?

કૂંપળના ગીતા લીલા પડતા મૂકીને ગાવ

રીમિક્સના ગાણાઓ ગાવ.

જાવ... હજી ફાસ્ટ ફૂડ ખાવ...

કાન એ કંઈ થૂંકવાનો ખૂણો નથી કે

નથી પેટ એ કંઈ કોઈનો ઉકરડો,

આપણા આ ચહેરા પર બીજાના નખ્ખ શેના

મારીને જાય છે ઉઝરડો ?

માંદા પડવાનું પોસાય કદી કોઈને'ય

સાંભળ્યા છે ડોકટરના ભાવ ?

જાવ... હજી ફાસ્ટ ફૂડ ખાવ...

લીમડાને આવી ગ્યો તાવ,

લીમડાના દાદા ક્યે કહી કહીને થાકી ગ્યો,

જાવ... હજી ફાસ્ટ ફૂડ ખાવ...

- Krishna Dave